Infos

Métier : mineur
Né en : 1896
Décédé en : 1918

A mon père

Incor tout gamin, à l’école primaire,
Quand un comorate étot mauvais joueur,
Et m’volot mes mapes … cha partot du cœur,
J’vas l’dire à min père !

Min père i savot tout : i savot tout faire :
Armette un carreau, réparer un fu,
Et que d’fos ch’consel ej’lavos intindu :
Deminde-le à tin père !

Des fos, j’n’étos l’victime première,
Quand j’étos indine, quand j’avos mal fait,
N’y avot que ch’mot-là pour faire ed’l’effet :
J’vas l’dire à tin père !

Pis en grandichant, chingeant d’caractère,
J’n’ai pus rien d’mindé : je m’croyos si fort !
Mais j’ai dû r’connaîte que j’avos bien tort
De m’passer d’min père !

Min père i n’y est pus, mais s’voix familière
Résonne à mes orelles, el’jour et l’nuit,
Et je m’dis incor, quand j’ai des innuis :
J’vas l’dire à min père !