Ballade d’Ches Monts d’Caiaux

Dit’s me chi, quo qu’cha n’est ch’pays
Qui arsann’toute à inn’taupinière
Veuc ses monts d’caiaux noirs et gris
D’ù quiqu’fos s’échapp’nt des funquères.
D’certains n’rest’ quiqu’pugnies d’poussières
D’z’aut’s sont incor fort imposants
Quo qui sont: ruches ou formilières
Nan in nomm’cha terril m’z ‘éfants!

I n’a des grands, des bins bâtis,
Des langreux, plats comm’des tortières;
Des fins, des ronds, des tout finis,
In cordillières ou solitaires;
Des ridés sillonés d’ornières
Des lisses ainsi qu’fourrur’ed fouan
Ziggourats ou bin baptistères
Nan in nomm’ cha terrils m’z ‘éfants!

I n’a des rouch’s, des ross’s, des bis,
Des chauves tout nus ,des sins manières,
I n’a qui sont peints vert de gris
Des qui s’print’nt pour des pépinières.
I n’a des douch’s qui s’laich’tent faire
Et des tout rait’s, des vraimint suants
Des montann’s sont ti ches tiots frères ?
Nan in nomm’ cha terrils m’z’éfants .

Os savez qu’y a pont d’long d’ichi
Inviron quiqu’z’ans in arrière
D’certains voulot’nt qu’in les ar’nie
Ches gros tas gacheux d’ nou leumière !
Aveuc lu dégaine ed chim’tière
Dins l’paysache z’avot’nt l’air gland
Ch’n’étot qu’des viux crassiers vulgaires
Nan in nomm’cha terrils m’z’éfants !

ENVOI :
Princes ed nou z’ex région minière
I faudrot in ches temps présents,
Faire in sorte qu’in puisse en’êtr’fiers
D’cheuss’qu’in nomme chi terrils m’z’éfants !

Cheul’ Parlache ed Parchi

Mi j’ai gramint eu querr’: « la langue de chez nous »
Cheull’canchon qu’Yf Duteil, i a si bin fignolée;
In l’intindant j’ôs l’jur’, j’n’a eu un cop d’grisou,
V’lô là inn’bell’canchon, aveuc un text’ sinsée.
Car à tout’s ches radios, in n’intind que d’z’inglais,
Des rappeux dérapés, d’z’ hardrockeux déjantés.
J’ai rin cont’e, après toute, i faut bin s’exprimer,
Mais infin d’compte faudrot pont oblier l’français !

Donc parlons l’provençal ou l’pariguot aussi,
L’ patois d’ches bons normands, l’français d’ches quebecquois,
Mais faudrot pont veyons qu’inn’ fos d’pus in oblie,
Que l’parlach’ d’ches picards ch’est aussi du françois !
Adon ôs permettrez, ch’n’est qu’justice après tout,
Que j’rajoute quiqu’couplet dins l’parlache ed parchi.
Si ch’est sûr qu’y a l’langue d’Oc, d’ù qu’ches « le » s’dij’tent « lou »
Y érot aussi l’langue d’Oil, d’ù qu’ches « moi » s’dij’tent « mi ». !

Ch’est un vaillant parlach’ qui ceurt dins nou province,
Inn’ piéch’ d’un viux puzzle qui armont’du fond des aches.
Si l’carpinte n’es montr’ point aveuc inn’seu batinsse,
L’ Français n’s’a pont construit, aveuc un seu parlache!
Et du sud Picardie, à l’lisièr’ d’ches flaminds,
In acoutant jacter ches gins dins nou pays,
Os pourrez perchevoir d’nou Histoire les tourmints;
Mais sins délamintries ch’est pont dins nous manies.

Ch’est un vaillant parlach’ , douche et dur à la fos;
Ainsi qu’sab’e ed nous plages inteur de d’ches marées.
Ch’est d’abord in s’taijant, qu’in in comprind ches mots,
In f’jant parler sin coeur, in évitant d’busier !
Nous « a » i sont tout fraiqu’s, in chuinte gramint aussi,
Quiqu’fos in oblie z’ « h », pis in armonte ches « re » .
In berche nou tiot quinquin, in brait autint qu’in rit ,
In arnéqu’ ches gros fats, in arclaqu’ches arvleux!
Si in s’met in colèr’, pé t’ êtr’ cha va barder,
Mais faut gramint l’cacher pour vire monter nou lait.
L’Histoir’ nous a apprind, quo qu’ch’étot que s’mucher,
Mais in connot nou d’voir, in l’a souvint moutré…!

Ch’est un vaillant parlache, adon osons l’moutrer!
Si cange ed sintimint ed villache in villache;
Ch’est pour chi démoutrer nou caboche ed beudet ,
Nou goût d’la liberté et nou profond courache.
Et du sud du Ponthiu aux confins Artésiens,
Si z’intindez canter dins l’parlache ed parchi.
Ch’est qu’par au d’zur les tiêtes corn’nt dins nou ciel ches vints,
Harpe aux couleurs de bise par la brise adouchies.

Pierre Delannoy (Enseignant)