Min Canarien

In ar’vénant de s’tournée, ein biau matin,
Min grand père m’avot rapporté ein canarien.
Plein d’couleurs, i étot si bien
Qu’aveuc des larmes plein mes yux, je n’véyos pus rien.

Aveuc quat’ bout d’bos et ein morciau d’grillach,
Bien rapid’mint, i a fait ein’ belle cache
Pinsez ein peu si j’étos fin bénach’
Avoir ein canarien, pour mi tout seu, à m’n’âche.

Adon, tous les matins, aux auror’s, je m’lévos,
Et, bien sérieus’mint, j’l’i apportos d’el ieau,
D’el salat’, des graines, enfin tout cho qu’i faut,
Pour qu’min canarien seuche toudis l’plus biau.

Ch’jour-là, j’étos intrain d’li astiquer sin cagibi,
V’là t’i pas qu’min canarien i s’s’saufe edsus ch’tapis.
Ch’cat, qui, dsus l’ tape, simblot bien indormi,
D’ein coup d’gueule l’avala sans ein bruit.

El mont’, sur mi i aurot pu s’écrouler,
Qu’à coup sûr, cha m’érot pont fait plus d’effet.
Toutes les larmes d’min corps j’ai brai.
Malheureus’mint, cha n’y a rien cangé.

M’grand mère, m’véyant dins ch’t’état-là,
Toute alpresse, amoureus’mint, m’prit din ses bras.
« Faut pont braire, min garchon, pour tout cha,
Dins la vie, y a toudis des moniaux pour ch’cat »

Avé Maria

Jé n’sais pont si vous connaichez bien l’églisse d’el Beuvrière!
Mais, in plus des aut’, el avot vers l’arrrière
Ein’sorte d’étach’, au fin fond d’el nef central’
Ed dù qu’in pouvot vire tous ché paroissiens assis din l’sal’.

Ché là qu’not’ curé, tous les ans, s’plaijot à parquer
Ches communiantes et communiants d’l’année.
I nous avot mis sous l’surveillance de ch’bédeau.
In n’i a fait tout vire; in étot pire qu’des sots.

El plus bel’, ché chelle qu’j’m’in vas vous raconter.
Adon, y avot toudis, à un certain momint, intonné par ch’curé,
Ein Avé Maria, qu’tout l’public i arprenot in choeur.
Ch’étot poignant, tout l’mont’ y mettot grand coeur.

« Avé! Avé!Avé Maria! » qu’al dijot l’canchon.
In s’étot mis tous d’accord, mi, ch’Gus, Ch’Paul et pis Léon.
Al premièr’ repris’ d’ché paroissiens, in s’est l’vé d’nos bancs
Et in a canté » Avé! Avé!Avé! A vélo! » tous in meim’ temps.

Ch’l’église al sérot queute sur l’tête d’ché gins,
Qu’in s’y sérot pont pris autremint.
Profaner ein’ si belle canchon, in plein mitan d’el mess’ !
In s’est arrêté tout net. A vir’ leus z’yux, i étot timps qu’cha cess’.

Not’ pauv’ curé, complét’mint démonté
S’adrechant à nous aut’ tertous, s’mis à hurler:
« Vous viendrez au presbytère passer votre après- midi. »
A g’noux, tout l’diminche, in étot comme des bannis.

Cha a fait l’tour ed tout ch’villach’!
D’vint nos parints in étot fin bravache!
Mon dieu, pardonnez-nous ein tel scandal’
Mais l’jeunesse, al pinse pas toudis à mal.

Joyeux Noël

Mes gins, in s’in va passer l’Noël au Maroc,
Ch’est ein cadeau d’not’ pitite file, o parlez d’un choc.
Ch’est l’première fos qu’in va prind’ l’avion
A Bruxelles incor, que d’émotions !

J’sus fin bénache d’artourner dins l’désert,
Ch’coup-chi, cha n’sera pont pour y faire el guerre.
Mi, j’sérai, les ortels in évental, bien au caud,
J’pins’rai à vous, qu’o z’allez gruger dins l’frod.

Je m’deminde si là-bas, l’pitit Jésus
I séra café au lait, aveuc des caveux tout crépus.
De tout’ façons cha séra toudis ein biau nouviau né,
El principal, ch’est qui nous z’apporte el paix.

J’vous souhaite à tertous ein joyeux Noël!
Que l’journée de ch’réveillon al seuche belle!
J’espère que ch’pitit papa i n’va pont oublier
D’mette gramint d’belles affaires dins vou sorlets.