Ches Coulonneux

Aujourd’hui mes gins
Et ‘ ch va vous parler un momint
d’un problème, que ch’cono bien.
Et’ ch’ va vous parler et’ chés coulonneux
Et de ch’ qui les intint
Quand y’ d’viendront vieux.
Cha va peut-être faire sourire
Tout cheux qui ne ‘ l’ sont pas incore
Mais pour eux aussi, un peut l’ dire
Ils n’échappront pas à leur sort.
Cha fini toudis par arriver
A cheus qui deviennent pinsionnés.

Et’ ch’va surtout pas vous parler
D’ leurs exploits, et d’ leurs champions.
Parce ‘ que, même avec un gros cahier
In pourrot pas tout écrire sur leurs coulons,
Vu que din leur société
Y sont toudis les meilleurs.
Et si au championnat, y sont pas premier
Ché à cause et’ d’ tous leurs malheurs !!!
Les tondeuses et’ d’ leurs voisins !
Ou bien et d’ leur linge qui pind !
Et’ d’ leur tchien qui gueule toudis pour rien !
Et pis aussi, et s’avions qui font du potin.
Et bien, comme vous l’véyez,
Même à coulon, un pourra pu juer.

Pour chés pigeonnier, ché incore pire,
Avant, l’ gratter, chéto notre plaisir.
Mais avec l’âge, et tous nos douleurs
Chà devient, un’ vraie corvée.
Pour chés nichettes, qui sont à hauteur
Ché pas trop dur pour nettoyer.
Mais l’ plus difficile, ché ch’ plancher
Quand un ramasse leurs crottes,
Pour s’arléver, un’ n’a plein ses bottes,
A cause et ‘ d’ nos reins qui sont coincés.
I’ un’ n’a qui sont des malins
I printent un’ hoette et’ d’ leur gardin
Et un balai qui z’ont récupéré
Pendant qu’leur femme a l’avot s’un cul tourné.
Mais n’impèche, ché un rude jeu
Pour chés coulonneux, qui d’ viennent vieux.

Et pourtant, juer à coulon
Ché un bon passe-temps.
Aller au siège, pour les inlogements
Ché un’ excuse pour sortir d’ s’ maison.

Surtout quand un a un’ petite buvette
Et qu’un peut boire, un’ paire d’ verres
Sans intinte s’ femme qui rouspette.
Discuter avec nos amis, nos copains,
ed’ nos déboires, et d’ nos misères
Tout un sirotant, s’un petit jus d’ raisin.
Et à chés dépouillements, chés incore mieux
Un intendant ed’ raviser chés feuilles ed’ jeux
Un écoutant tous chés coulonneux.
Chés raleux, chés grincheux, chés rouspéteux
et aussi, cheus qui sont contints
D’avoir bien constater
Et ceux qui ont l’espoir, pour certains
Et qu’ leur coulon, y s’ra l’ premier
Un tout cas, pour eux, ché incore un’ bonne journée.

Et avant d’s’ un aller diner
Y vont un avaler un dernier.
Y’ un’ à, ché d’ébousemint
Y’ un’ à, ché contint’ mint
Mais tous y s’ont un point commun
Chés coulons, ché leur passion.
Et qu’ils soient tristes ou contints
Y’ pourront pas, s’passer d’leurs coulons.
Et, in rintrant à leur maison
Avant d’qu’émincher à minger
I’ vont aller jusqu’à ch’ pigeonnier
Raviser si’ y’ leur minque pas d’pigeons.
Ché cha qui s’appelle un’ passion !!!
Et comme je l’ disot au début,
In est bien malheureux, quand un’peu pu
S’occuper ed’ nos chers coulons.

Pour Ché Pinsionnés Qui Sont Péqueux

A mes grands camarades péqueux,
pendant mes momints perdus,
j’ai pinsé, que quand’in d’viens vieux,
Même péquer, in’n’iarif pus.
Cacher des viers, cha d’vient laborieux,
Quand y faut s’abaisser,
in’a du mau à s’arlever.
Et in peut l’dire, ché un rude jeu,
D’ête péqueux quand’in d’vient vieux.
Pour péquer ché pas gramin mieux,
Si ché au vier ed’vase,
In’a biau faire des grimaces,
Ch’a d’viens difficile à l’mettre ach’l’ameçon,
Quand l’vue à l’baisse, vous savez,
In’a biau savoir attraper du pichon
E’ch’vier éd’vase, hé bin y faut l’infiler,
Alors quand in’vo pus fort clair,
In péque à l’asticot ou au vier d’terre,
Ché déja un peu plus gros,
Y’in à même qui mette d’el pomme de terre,
Y paraît qu’cha va mieux à piquer,
In tout cas ché moins compliqué,
Et pis in s’pique moins souvin ses dos,
Et oui, mes pôvres vieux,
Ete péqueux, ché un rude jeu.
Y’ia aussi l’histoire du bouchon,
Y faut pas qui épouvinte ech’pichon,
Mais si un n’in met un tiot,
In l’vo pu quand yé d’in l’iau,
Et oui, comme je l’diso au début,
Même péquer, in pourra pu.
Et pourtant, péquer, cha fait passer l’temps,
Quand in peu pu faire comme avant,
S’occuper de s’petite femme, de s’passion éteinte, s’flamme.
Et oui mes pôves amis,
C’est ainsi, c’est comme ch’a la vie.
Et pis, l’péque, ché in’distraction,
Même si un prin pas d’pichon,
Ché in’exuse pour sortir d’es maison,
Surtout quand in’a pris des provisions,
A mingé et surtout à boire,
Car au bord d’é l’iau,
Vous pouvez m’croire,
In s’régale, quand in bo in tiot co,
Vu, qu’un a besoin souvin d’arroser s’in gosier,
Et’ouai, vous pouvez rigoler,
Tous ché péqueux, y sont pas minteux !!!
Hum !!! in tout cas, pas tant qu’ché cacheux.
Et l’pire, ché qu’après,
Avoir tant travaillé, tant trimé,
Sur in tel plaisir, un peut peut même pu compter,
Et d’pinser que vous pourotes pu péquer,
Ch’a m’rin malade, et ché vraimin malheureux,
d’ête péqueux, et d’devenir vieux,
Mi, j’min fout, j’su coulonneux.

Raymond Fontaine (mineur)