Infos

Poète mineur
Né le : 26 juillet 1881 à Noyelles-Godault
Décédé le : 18 mars 1904

La Mort du Galibot

Au fond du grand tro noir, perdu dins l’nuit profonte
Samuel mène un treuil, l’dangereux Treuil Leconte.
In fait quinzain’ Saint’-Barb’ ; l’binache est plein d’carbon.
Aussi sans printe el temps d’frotter l’sueur dé s’front
L’brav’ petit galibot nu jusqu’in bas d’l’échine
Bouillant, soufflant, finquant, comme unn’ pétit’ machine
Fait marcher les barous comm’ l’express les wagons
Soul’vant l’poussièr’ noirâte in épais tourbillons
Les ball’s déval’nt dins l’treuil comm’ dins l’foss déchind l’cache.
L’pouli grinche et crach’ feu comme un dragon in rache ;
L’cord’ siffl’ comme un serpent ; les lourtes chaîn’s ed fer
Faitt’nt un bruit effroyage. In s’crorot in infer !…
L’treuil marche à tros barous ; il est assez rapite.
Les galibots du pied s’dégourditt’nt au pus vite
Pou fair’ manquer in haut, mais sans y parvenir.
Manquer à Samuel ! i s’f’rot putôt mourir !
…
In vient d’sonner ahu. Les belin’s plein’s sont prêtes.
L’barrière est cor fremée, pindue à des chaînettes :
L’galibot l’ouvre, imballe et… pousse un cri d’horreur.
Les trois balls part’nt au fond ! décroché’s !… Pris d’frayeur
Samuel s’est d’abord intassé dins s’cabaine.
Dins s’niche i peut s’flatter d’ête in sûr’té certaine ;
S’il y reste i n’peut même pas être égratigné
Mais ch’est sûr’mint la mort pou les gamins du pied.
N’étant point avertis du danger qui les m’nace
Les tiots sont in plein voée ; incore un p’tit espace
Et les ball’s comm’ trois rocs roulant du haut d’un mont
Vont v’nir les aplatir ainsi qu’des figu’s au fond.
Alors el’ galibot quitt’s vaillammint s’cachette,
I s’précipit’ dins l’treuil et fait marcher l’sonnette.
Oubliant s’propr’ danger pour sauver les deux p’tits.
L’vibrant signal d’alarme est juste à temps compris :
Les décrocheux sont saufs. – Mais au pied dé l’montane
Les ball’s ont accroché les barous vut’s in panne…